Tojsiab Kho Siab Zim.
Nyob tojsiab….......cua tuaj nplawm ntws
Nplooj siab ntsws….......nyob kho siab khuav
Nyob tsis dhuav….......nrog tej huab cua
Zoo tam ntua…........nce ntuj ceeb tsheej
Kev ywj pheej…........muaj nyob puv npo
Yeej tsis nco…........txoj kev lwj siab
Tawm hnub tshiab…........los zoo sib xws
Nplooj siab ntsws…........nyob tau kaj nrig
Ntsia puag ncig….........roob hav cab niab
Nyob toj siab…........cua tuaj txias zias
Nplooj laim txias........…kho siab kawg nkaus
Tas hluas laus........…seev nco yaj sab
Nplooj siab fab........…nco roob xyuam yaj
Thaum ntuj kaj…........noog quaj ntsuag qees
Sawv ntxov tsees........qaib qua zom zaws
Sib yaum daws…........ua noj ua haus
Hmoob tej laus…........coj qhia tej hluas
Qhuab thiab ntuas….......kom ua neeg zoo
Thiaj muaj hmoo.......…tau txais koob hmoov
Sib qhia hloov….......kawm kev ua noj
Sib pug coj….......kawm kev ua neeg
Txheej dhau txheej.......…los lawm ntau tiam
Peb cov niam….......los zoo pov haum
Zoo cuag npaum….......niam nkauj hnub ntsa
Uas nws xa….......duab tshav tuaj ziab
Ntiaj teb tshiab.......…vim muaj nkauj hnub
Niam kev hlub…........tsis muaj hnub ploj
Tab txawm yog…........niam txiv khwv khwv
Lub me fws….......tsis qhuav ntawm phlu
Los tseem tu.......…tub ntxhais loj hlob
Tsis muaj mob….......tiav nkauj nraug ntsug
Ntog pawg lug….......cuag taub cuag dib
Rov hais pib….......txog ntawm roob hav
Toj roob dav…........hav zoov ntsuab xiab
Nyaj Cuam Liab.......…quaj kho siab zim
Sab puag tim…........laj roob tim ub
Hav zoov dub…........muaj noog muaj nas
Muaj txhua tas........…me tsiaj nruab nrag
Caij ntuj nag…........ntuj qhua sib xws
Nplooj siab ntsws.......…nyob tau kaj liag
Zoo kawg kiag….......teb chaws toj siab
Pos huab niab….......huab cua tus yees
Sawv ntxov tsees.......…1 ces no ntxiag
Zoo rub kiag…........tus neeg yus hlub
Muab nws rub…........los puag sov so
Txhua txhua hmo…........puag rawv tsis nrug
Thaum kaj ntug…........mam lit so cia
Nyob tojsiab…........txawm tsis muaj nyiaj
Tsis muaj txiaj…........tsis muaj tsev zeb
Tsis muaj tsheb.......…nrog luag tej tsav
Tab sis cav….......tsis tshuav twg nqi
Thaum txog hli.......…tsis muaj neeg tsib
Tsis muaj pib….......muaj bill yuav them
Nyob lom zem….......kaj siab kawg kiag
Yog tham tiag….......mas yeej tshuav ntev
Hais txog kev….......noj nyob toj siab
Lub tseem ntsiab…........piav tsis paub xaus
Cia lwm zaus kuv mam seev dua mog!!!
Ua Tsaug.